有時候你明知道佢not really into you，又或者拍咗拖一段時間心底裏知道唔適合，但就係無勇氣狠下心腸來個了斷，心十五十六然後拖得就拖，不斷講啲理由去說服自己留低：
1. 佢幾日無覆我msg因為佢要專心事業
2. 佢暫時唔想承認呢段關因為佢太念舊，未放低上一段感情啫
3. 佢出軌都只係純粹貪玩，佢應承我以後只愛我一個唔會再犯
4. 佢同佢而家女朋友已經拍咗拖五年，加上佢又好重情義，我都明白分手要再需要多啲時間
5. 佢覺得如果我哋結咗婚，感情就會變質，所以都係維持現狀最好
喂呀，女人們可以停一下啲excuses嗎？
話說喺聖誕直到新年嘅期間，收到好幾個好曳曳嘅讀者DM，同我傾完一大輪之後，最後又轉返軚，為對自己唔好嘅男人編藉口。當然你哋當我樹洞我無所謂，但係女生們嘅故事，包括有發現對方劈腿，男方不斷話會同女朋友分手但又一直無做到，甚至有女生受到暴力對待，我心裏面真係戥你哋好唔抵！即使精神同肉體上不斷受到折磨， 仍然死心塌地留喺男方身邊，繼續說服自己”其實佢有時都對我好好”，無止境咁縱容令自己陷入無限嘅惡性循環中真係好慘。
曾經聽聞世上有一種病叫斯德哥爾摩症候群,或者人質綜合症。故事發生喺1973年，瑞典斯德哥爾摩發生銀行搶案，當時劫匪狹持入面四名職員，與警方對峙近六日之後最終放棄投降。然而幾個月後，四名曾遭受挾持嘅人質，竟然產生同情之心，無人願意企出嚟指證劫匪，一名女人質甚至愛上其中一位劫匪同佢訂婚！心理學家嘅解釋係，當你嘅性命已經決定於一個瘋狂殺手之間，殺手嘅一句問候，准許嘅一啖飯一滴水，甚至可以繼續生存，都會覺得係殺手對自己嘅慈悲同恩賜，然後演變成感激。其實同籠中鳥嘅道理差唔多，一直被困住嘅以為自由飛翔係一種病，覺得自己已經好自由...其實，你係可以反抗，你係有得揀㗎😤😤😤
放唔低，並唔等於離唔開。其實所謂嘅離唔開，都係自己嘅執着、唔甘心、唔想失去...又或者係習慣。心情混亂嘅時候不妨問下自己：呢段關係會有將來嗎？我自己開心嗎？我有無因為呢段關係而迷失自己?得到答案之後就要有作出決定嘅勇氣，先離開不良關係，再慢慢讓時間令自己放下。一個真正愛你嘅人未必每日同你講”我愛你”，但一定唔會做傷害你同消耗你嘅事。遇到值得嘅人放膽去愛，遇唔到都唔需要委屈勉強。幸福並唔係等人比自己，就算你自己一個人都可以過得好快樂。
希望妳們早日離開綁匪，不再做愛情人質。
共勉之。
#要自愛同自重
#女人像鹽
IG: Missyboni
Search